swjg

Huldigung an König Kilian Wenger

Uesi schtarche Bärner-Schwinger
g'winne meischtens - doch nid immer
jetz het's aber eine g'äh
dä cha de würklech jede näh

e Kilian Wenger vom Horbode
dä isch jetz Trumpf u grossi Mode
es isch e ächte Bärner-Bär
eis-nünzg Gross und hundert Kilo schwär

u we me dä de ou no g'seht
es hundert Prozäntigs Chraft Packet
Sy's Vorbild isch de Abderhalden g'si
I wett au mal so Schwinger-Chönig sy

Scho mit sächzähni isch är schtarch und breit
Philipp Laimbacher uf e Rügge g'leit

Jetz mit zwänzgi, e Bäre-Schtarche Maa
wo au mit jedem Schwinger z'bode ma
wiu är taktisch guet und überleit
nid Grings vora i Zweikampf geit

(Plötzlich g'seht me sy Betreuer schpringe
u Ihm sy's vergässne Hemmli bringe)

Der Chönig Abderhalden, Kampferprobt
chunnt gäge Wenger jetz i grossi Not
u het ou ehrlich müesse säge
Ja, i bin uf em Rugge g'lege.

Aui acht Gäng y'drücklich gwunne
taktisch guet und u chraftvoll g'schwunge
Nach em Schlussgang seit de Martin Grab
Ja i ha verlore, das isch schad
Aer tuot sich aber nid Schiniere
em Schwinger-Chönig z'gratuliere.

Mir alli schliesse us ganz Härzlich aa
u wünsche Ihm, s'mög wytherin so gah
u's wichtigschte uf Dym Läbes-Wäg
Mir wünsche Dir: Blyb G'sung und Z'wäg !

Roland Gottlieb Neuenschwander
Dürrenroth
24. August 2010